Sampi Gawai Umai

Sa, Dua, Tiga, Empat, Lima, Enam, Tuuuuuujoh!!!

Enda aku busong ngelanggah gunong,
Enda aku tulah ngelanggah tanah,
Enda aku danjan ngelanggah bulan,
Enda aku tumbang ngelanggah bintang.

Ooo… nama pemusong,
Nama pengelunggong?
Nama penulah,
Nama pengerebah aku deh?

Kaki aku udah bediri di segi besi belumpong,
Ngeli aku udah ngetup badi pendawan busong,
Lengan kanan aku udah ditanggam enggau beringan lanchum selong,
Pala aku udah dibap enggau singkap jalong jebong,
Belakang aku udah tinggang saludang baju burong.

Aku ga baka paku sulor gelong,
Baka tubu sulor rebong.
Baka bulang tampong tengang,
Baka ijok tampong pendok,
Baka wi’ tamping tali,
Baka rutan tampong danan.

Aku ukai muntang ukai nengkebang,
Aku ga endang tiris endang pantis,
Endang tambak endang telesak,
Endang puchok endang sumbok,
Endang nampong endang nerujong,
Ukai alah randa aku deka,
Ukai alau jayak aku jegak.

Aku ga nunda adat Sera Kempat,
Ke berarat niti jelatong,
Nunda pantang Belang Pinggang,
Ke senayang baruh senuyong.
Aku ga nunda penti antu gerasi,
Datai ari tisi langit gadong.
Nya utai ke ditunda utai ke selada,
Nya utai ke dichuan utai ke teladan,
Nya utai ka dititi utai ke tali.

OoooHoi!!! x 3 (nya baru miau piring)

Ni nuan munti indu ai,
Kita senggang siti madang,
Sungai di-ulu sungai di-ili,
Bukit turun bukit tiki.

Ni nuan indu dara pandai,
Ke bejalai lempak luak,
Nya ga karong penyurai rumah panjai.

Ni nuan dara mereti pantun ati,
Ke bediri tenjik-tenjik,
Karong lamba tiang medang.
Ni dara ganggam bau nyelenga,
Karong tungkat dua besakang.
Ni nuan dara burok,
Ke tindok enda bepua,
Karong temetong ranggong kalang.

Ni deh Achin Perin dibelah,
Karong gelegar patah,
Enda kala mindah kelakuyah,
Gerah tanchang.
Ni nuan endat betumpa sendat,
Mali lengka,
Bunsu kempat paan lintang.

Ni nuan endu chelum ngelepu,
Bunsu pintu ke bedaru bandir tapang,
Ditangkan ka jelembai dara pandai,
Bunsu tikai rinan surang.
Lalu tangkan ka imbun,
Ke pantun mereti ati,
Bunsu baku tuang tukang.

Ni endu Dra Kelinah,
Tampok buak pinang belubang,
Ditangkan ka dara milih sinu kasih,
Bunsu sirih betumbok takang,
Ditangkan ka endun betuboh chelum,
Bunsu sedi lulun,
Dituom unggun atas bedilang.

Ni nuan endu dara liut,
Kumang lembut semakau dagang.
Ni kita ke tindok nakal singit,
Kita ke bejalai ngena burit,
Bunsu chapak burak,
Ba-ukir ilak kesulai tandang.

Ni nuan endu ganggam bedai lada,
Bunsu penganan baka bulan rerak rumpang.
Ni nuan dara biak,
Ke kejengkak enda belanda,
Bunsu letup bunga kejumpang.
Ni nuan bujang mit tegar enselit,
Bunsu pulut jantau jentawang.

Nya kita dulu ngambi mansang ngambi ngabang,
ngambi makai ngambi nandai,
angkat samoa angkat sereta,
angkat abis angkat lengis.

OooooHoi!!! X 3 (nya baru nyampi ngangau ka petara aki-ini)

Tu baru terai-terai,
Betenchang ratai,
Nyadoh ka tuboh ngerintai tuai.
Aku ngangkat ka orang ke lama udah tumpat,
Tinggang urat sebangki api,
Aku nyungkang orang ke lama udah tumbang,
Tinggang batang tebelian wi.
Aku nyerungkai sida ke lama udah parai,
Keranjai indai imbok kedidi.

Ni nuan Sera Gindit ke ngaga langit tinggi nungkat neraja?
Ni nuan Sera Gindam ke ngaga malam kelam petang kelita?
Ni nuan Sera Gindi ke ngagai ai ke bepati maioh nanga?

Ni nuan Dami ke datai ari karang batu api,
Ke menyadi rendang-rendang,
Bejulok terantang gendang nanyi,
Kena selantang bujang mereti,
Ngalu Aki Lang Menari,
Datai ari kunchi pintu hari,
Ke lelanji baka bunga besi bilai tenchang.

Ni nuan Lanchap ke datai ari ujong Tanjong Lipat,
Kena belat tiang empang,
Bejulok terantang gendang pampat,
Dua kali rengat danggang-danggang,
Kena selantang bujang sigat,
Ngalu Aki Lang Bengap,
Datai ari salikap langit entap ngebong ngeruang.

Ni nuan Chabu ke datai ari ujong Tanjong Datu,
Tikam temuku tali tekang,
Bejulok terantang gendang pambu,
Kena selantang bujang tuyu,
Ngalu Aki Lang Bangu,
Ke bejugu nansang ka belakang.

Ni nuan Ambau ke datai ari Pangkalan Tabau,
Peling lanting tawang menang bedagang,
Bejulok terantang gendang kangau,
Kena ngalu Aki Lang Bungau,
Baka ke pansut ari likau nabau samenang.

Nya alai nyau enda ulih ditesa tuai ke udah nadai dulu lela,
Baka laja geran lungga juing pematang.
Ni ulih tiap aku tuai ke udah nadai dulu lenyap,
Baka ke niap singkap kerang kepayang.
Tu baru aku nyerungkai sida ke dudi parai,
Enggau orang ke ulu mandai rawai.
Aku nyungkang sida ke dudi tumbang,
Enggau orang ke ulu mandai puang.
Aku ngangau ka Petara Jalir, Petara Gisang,
Petara Geringu, Petara Sumbang,
Petara Uyut benama Bedilang,
Petara Sabok Apai Maang,
Petara Dana Rekaya Bayang.

Nya alai amat pisit utai tu agi jarang,
Amat maioh tang agi ga lapang.
Enti bumai sapa kitai tu pandai nampai antara?
Enti nugal sapa kitai tu tau nampai senggal bintang tiga?
Nadai…!!!, randa kitai ditu nadai tau nengua ngambi ngabang.

Uji gagai orang di pun kara nurun,
Be betusun betunda runti.
Uji tanya orang di batang medang berambun,
Ke berua apus hari.
Nya ga menoa pangkang Lenguyan tangga ban,
Sabulan bediri tenjik-tenjik,
Nya menoa dipangkang Bunsi,
Mati sakejap ke bejalai jampat malik.
Nya berada apai nuan manok banda,
Bedada nyala ngerang kepayang,
Ke betada ringkat empat,
Ngair ditanah puting munggu.
Nya berada apai nuan manok sabong,
Punggong geritong tuntong rajang,
Iko ke beserepang betugang buloh layu.
Kati randa nuan aki tau diasa ka kami nengua ngambi ngabang?
Kati gelai nuan aki tau diasa kami betandai ngambi mansang?

Anang guai dulu nganti aku nanya indai.
Amat indai aku berita enda pandai,
Malik kita ka bilik peda kebejong bejur pua.
Taja apai aku berita enda berani,
Malik kita ka ruai peda bakakitang antu pala.
Orang nginjau aku ngambi mansang, ngambi ngabang,
Ngambi makai, ngambi nandai.
Nama kabuah enggai deh!
Keba kitai bisi kaki,
Kena bekenji angkat bejalai,
Keba kitai bisi sayap,
Kena engkebab angkat terebai.
Keba kitai bisi mata,
Kena ngelala meda utai.
Keba alai bulu kitai,
Disamak enggau resu garu kirai,
Sayap kitai dibap enggau singkap pinggai pemakai.
Patok pasok ka bentok Tinchin Lumbai.

Tak lalu enchengai munyi Embuas,
Tak enchai’ munyi Pangkas,
Lalu ngembau munyi ruai,
Tak ngakak munyi tajai,
Ngair di tatai balai gambang,
Nidit munyi landai,
Tak nyapa munyi orang.

Ni deh Kian Dara Kuyan,
Bunsu geran tangga gerunggang?
Lalu kedemik nempap bungkong,
Nempap lamba tiang kenyalang.
Ni nuan Endu Dara Jata Lau Moa,
Berumah dirandu ungkap nudong,
Karong jerua ikan ngaban,
Di Kerangan lansar nunggang?
Nya orang maioh kaban datai ari kanan,
Maioh aka datai ari kiba,
Maioh indai datai ari sungai.
Maioh ga aku tuboh,
Tang satu jadi penghulu,
Maioh ga aku kaban,
Tang saribu asoh aku nemu.

Sida ari tanah asoh aku ngeluah naka punggong,
Sida ari langit asoh aku nilik naka rekong,
Sida ari ili asoh aku mudik sabuah bandong,
Sida ari ulu asoh aku undur sabuah buong.

Nya baru terbai manok tawai,
Ke terbai kelah-kelah,
Nya baru terbang manok labang,
Terbang ngelayang rumah.

Tu baru taung-taung,
Belumpong nibong,
Nyadoh ka tuboh,
Aku ngerintai tuai burong.

Ni nuan Ginjong Kumang Badong Bunsu Ketupong,
Berumah di semilu batu anggong,
Baka benong benda tepayan?

Ni nuan Kumang Dara Jengkang,
Indu ke bejako sinu ngenang,
Ditelah Sambang Sambai Bejampong,
Berumah di semilu batu galang,
Baka selang madu renyuan?

Ni gima Dara Bagas Bunsu Embuas,
Berumah di pating kayu kempas,
Dan atas lichin lindas,
Baka pusin pulas tekuyong kaban?

Ni Rimai Dara Rima,
Bunsu Beragai burong gaga,
Berumah di tatai panjai raya,
Pelintang batang purang ruman?

Ni Gimok Dara Gauk Bunsu Kutok,
Berumah ditelok kampong narok,
Dan puchok baka penudok Tuan Assan?

Ni Gimau Dara Bagau Bunsu Kelabu Papau,
Berumah di dan lansau,
Endor mandau ke nganyau ngerumban dan?

Nya baru ranchak Kumang Bambak,
Bunsu Nendak berumah di tanah seradak lebak,
Enda kala tinggang teratak leka ujan.

Ni kita ke ngasing di belakang tinting,
Kita ke nyikat di tanah lengkap?
Nyangka kita tak saru pilih aku baka antah,
Nyangka tak saru cheroh aku baka kubah.

Anang kita ati kudi ati jai,
Anang kita ati salah ati enda manah,
Ngabang samoa ngabang sereta,
Ngabang abis ngabang lengis.

Nya baru terbang manok labang,
Ke terbang ngelayang rumah,
Manok tawai sarimbai pagah.
Lalu inggap di menoa orang,
Ditinting salangking pisit,
Baka dinjir entak tiang,
Di dan emperawan bangkit,
Baka lepi sanggul lintang.
Nya ga menoa pangkang Menyawai,
Ke nyulut tuai enda mindah,
Dipangkang Bawan Enturan Timah,
Pebayu sulu enggi iya Bikhu Bunsu Petara,
Pantan inan Raja Jadia.

Ni kita ke di engkajang lenjar batang,
Munyi ka nempap sambang rumbang kesuling,
Kita ke di pun kara nurun,
Munyi ke ngentum talun ruding aping.
Nya menoa di pangkang Bujang Belang Labang,
Sugut-ugut tapa kaki,
Burak pala munjong ka dai.
Keba alai bini iya,
Endu Tangkong Labu Genalu,
Lendu-lendu dudok dia antara temuai datai,
Endu Satembul Tampok Bunsu,
Ditemu antu Bunsu Selampandai.

Nya baru taung-taung,
Belumpong nibong,
Tasau bedau layang,
Ngelanggang kijang.
Ni deh iyang aku,
Lemambang Bunsu Burong,
Berumah di tuchong Rabong Deli,
Dipangkang Bujang Runggang Sarang,
Ke bejabong kepit lidi?

OooooHoi!!! X 3

Ni deh iyang aku,
Lemambang Sampang Gading,
Tulong aku nyadong letup asi kuning,
Ka tanah rapi tinting,
Ngambi nuan tau merening milih nama.

Ni deh iyang aku,
Lemambang Empeliau,
Tulong aku nyadong letup asi timau,
Ka tanah rapi pulau,
Ngambi ka iya bebali nyadi aka Buau Nasa.

Ni deh iyang aku lemambang Embuas,
Tulong aku nyadong letup piring beras,
Ka tanah rapi radas,
Ngambi ka tau ngerepas kaban Petara.

Aku ga pinta ganti nuan,
Baka titi jamban penjuang,
Pinta tampong nuan baka semeliong putus pungkang,
Pinta silih nuan baka upih ganti mayang.

Nyangka kangau aku enda jelai,
Nyangka sapa aku enda datai,
Nyangka kangau aku enda didinga,
Nyangka sapa aku enda nyengala.
Eh! Nama kabuah aku enggai deh!

Lalu terbang manok labang,
Trbang ngelayang rumah,
Lalu terbai manok tawai,
Terbai ngerimbai pagah,
Inggap di menoa orang di kechapah dulang igal,
Karedup bandir ubir,
Munyi bujang begaligir berengkah ngirup.
Nya ga menoa dipangkang Endu Sanawang Nawin,
Indu orang di Beringin Gantong Gendang,
Kadua bali nama iya,
Endu Sanawang Nawin,
Indu di jengku ruas tulang.

Ni nuan Endu Kedemi,
Indu orang di titi rian nyadi,
Ke pegari pisit lungkang,
Iyak Salinggar Matahari,
Digelar Patri Rambu Benang.
Ni dek Kelinah ke ditelah Indai Abang,
Ni nuan Endu Puyu Balu Menyagu,
Ke ditanak dara biak,
Ke disium ngaba ngalu,
Ke nempuah sium pengabang.
Nya baru ngangau ka Endu Lulong adi Tutong,
Tuai orang di Gelong Batu Benang.
Nya baru ngangau ka Jawai,
Endu Ensengai Dayang Kumang.
Enti kita gawa ngasing gawa nguing,
Gawa nyikat gawa ngebat,
Gawa muntang gawa nengkebang,
Lengka ka pengawa kita.
Abas kumbai abas sanggai,
Abas padah abas tunggah kami tu.

Enti pengawa kami tu,
Endang udah meda kita,
Enggau orang ngila ngerja gawai.
Enti kerja kami tu,
Lama kita udah ngemata,
Enggau orang nginta mela utai.

Kejang ka ari nya,
Lalu manggai di menoa orang,
Di emperan madang bemban,
Baka ka nyan genteran sangkoh seligi.
Manggai di batu betangkong,
Baka bangkong lundai kemudi.
Nya menoa dipangkang Sigundi Sepit Api,
Ke bejari rangang-rangang,
Tuai kitai ke nadai dulu lesi,
Alah di kaki Lembang Muang.
Apai Jelingau tu enda kala lenyau,
Datai ari tuchong Panggau Libau,
Menoa lebat di biau takang isang.
Apai nuan Datu siko ke pemadu tau serang,
Keling Aji ke berani mutus parang.

Ni nuan Ensing Gima bedada nyala ngerang kepayang,
Apai Laja aka dara Lantan Sakumbang.
Ni nuan Lunsing Kuning ke berani kering,
Enda kala nyelaing ka sumping dengah orang.
Enti iya sahari enda bayam besi,
Semina kulit iya ngelamun tulang.
Enti iya sabulan berujan pendawan,
Ngasoh tuboh iya gangam lamunang mansang.

Ni nuan Sempurai Sumba,
Ke linga pala pengerang.
Sempurai ketau datai ari Tugau tunggol tebang.
Nya baru ngangau ka Laja siko,
Ke dikerindu indai orang,
Laja sigat ke sarangkap panau jarang.

Nya baru ngangau ka Pandak Sera Gatak,
Ke datai ari Samak Gayak Gantang,
Menoa iya di tanah sepan badak,
Ke nempuah bau lang.

Ni nuan Tutong Ulop Demong,
Ditelah Bujang Lemandau Gendang,
Nya ga tuai orang di Gelong Batu Besundang.
Ni nuan Ngelai,
Tuai orang di Meligai Pungga Pungkang,
Ni nuan pendawan besi tajam,
Ke tikam mali salah,
Nya berada apai nuan Lua Limban,
Nyulut rangka utai diempa,
Enggai bedua enggau pangan,
Telan taban segala-gala,
Bejulok tisir jangkam,
Ke tebalan sugu mekang.

Aya apai Migu udah datai ditu,
Ke siru nasak kelingkang.
Aya apai Mama pan udah ga datai ditu,
Ke tuga sakai serang.
Enti kita gawa ngemata ka orang ke berani ka bisi ati,
Orang ke tau kayau tau pulau,
Orang ke tau serang tau pandang,
Lengka ka dulu pengawa,
Abas kangau abas tesau,
Abas padah abas tunggah kami ditu.

Ensana kami endang tu udah ngipa,
Diseraka pampang jalai,
Kemari kami endang udah nganti,
Diserambi langkau umai,
Tang saharitu baru kita datai,
Enti iya ke kait,
Tambit di selabit pakau keladan,
Enti iya buta iring berjalan.

Lalu terbang baru ga manok labang,
Terbang ngelayang rumah.
Lalu terbai manok tawai,
Terbai kelah-kelah.
Lalu manggai di menoa orang di munggu madang pudu,
Ke tau diteku gelong ka tuong,
Ambi lansu manang menani.

Manggai di lembang pungga agang arang tebelian,
Kena ngamboh pedang jadi berani.
Nya menoa dipangkang Selampeta,
Tukul lenda ke betempa rentang-rentang.
Menoa dipangkang Selampetoh,
Tukul kamboh ke tau ngaga tuboh,
Nyentok ka Maloh langgai Tawang.
Nya ga anak silit-ilit ngemata ka bukit sanggit gerunjong,
Anak Silik-ilik ngemata ka tasik linang ledong.

Lapa pintu tak tekebu lalu tesilak,
Lapa dinding tak teseging lalu teberak?

Nya ga manok labang ngambi ngabang,
Manok tawai ngambi makai, manok pagah datai madah,
Ke sulu jako pekirum,
Pesan anak mensia.

O…nama kabuah aku enda ngabang enda mansang…!!!
Nama kabuah aku enda nandai enda makai…!!!
Aku ga dulu nempik lang burik,
Ngasoh iya bisi jungkal bau rinda.
Aku ga dulu nempap dara nelap,
Ngasoh iya bisi selingkap selangka dada.
Aku ga dulu mechal bujang tegar,
Ngasoh iya bisi jungkal bau rinda.
Dini aku ka ngasoh iya merinsa ngasoh iya pesena,
Ni aku ka ngasoh iya sakit iya lengit,
Ngasoh iya enda gerai enda nyamai.
Dini aku ka ngasoh iya nadai taun nadai di ibun.
Dini aku ka ngasoh iya nadai umai nadai empalai.

Nya baru terbai baru manok tawai,
Ke terbai kelah-kelah,
Terbang manok labang,
Ke terbang ngelayang rumah.

Nya baru ingap di munggu lunsur ujan,
Ngemeran ka perugan pumpun temiang.
Ke jedam-jedam baka tegalan lama lang.
Nya menoa pangkang Rekaya Biak,
Ditelah anak Raja Simpulang,
Nya menoa dipangkang Rangkang Kirai,
Ngembuan utai nadai ketimpang.
Keba bini iya Endu Sudan ke serentam tanah tumboh,
Garas-garas tampak panas tengah menoa,
Endu Kumang subang bekaki,
Ditelah aku genarang tanggui buloh,
Kepai-kepai terbai didanggur dandang uma.

Manok labang tu nambi ngabang,
Manok tawai tu ngambi nandai,
Manok pagah tu datai madah.

Anang guai dulu ka Simpulang Gana,
Nganti aku udah ngangau ka orang,
Di letong Bungkas Kerangas Mas,
Pandang jelas api kilat,
Orang di kerangan arang lepong nyegang,
Dipandiang diang lampu berasap.

Nya menoa dipangkang Gangga Ganggong,
Ke penyadong tuah limpah,
Nya menoa Gangga Ganggai,
Ke penatai utai mudah.
Keba alai bini iya endu iyak ke pengebak pintu kemarau,
Kumang ke ngembuan gempanang tekang mau.
Betumpu alan enggau orang di ai sungai ragki,
Betampong lepong danau mau.
Betumpu alan enggau orang di lupak ulak majak,
Betampong letong danau tajau.
Nya menoa dipangkang jelukong tuai,
Berumah di penyurai tisau langit,
Raja Rirong berumah di menyaung tuchong bukit.

Kati randa nuan aki,
Enggau nengua nurun ngabang,
Kati gelai nuan enggau betandai nurun mansang?
Aku endu enda,
Laban aku ngemata ka betong ke betampong ruya-ruya,
Ke beranyut datai ari laut.
Aku ngemata ka orang ke bepending lansik ninga,
Ke ditanya enda nyaut.
Nama utai telah nama nya?
Nya nadai ditanya ka nuan,
Nya ga karong pebenong benda segiu,
Ke beukir manah lagu besilup punggang,
Karong benong benda menaga,
Ke dua pakau melintang.

Lengka ka ari nya,
Lalu bejako meh Gangga Ganggong,
Ke penyadong Antu tuah,
Gangga Ganggai ke penatai utai mudah.
Enti randa nuan Sigai nengua nurun ngabang,
Aku enda enggau.
Enti orang gawai ngintu semilu batu entap,
Enti orang ngaga gawai simpuli padi lensat,
Aku enda enggau nuan ngabang.
Nya alai ubat enggi aku bai ulih nuan,
Ke sarangkap genap nadai ketimpang,
Pangaroh enggi aku bai nuan maioh,
Nadai kurang.

Nya alai Sigai lalu betandau nurun mansang,
Randa iya ke nengua nurun ngabang.
Enda sempat iya datai di menoa sida di munggu lunsur ujan,
Ngemeran ka perugan pumpun temiang.
Di tinting pemaring bulan baka tegalan lama lang.
Tu menoa Rekaya biak,
Telh anak Raja Simpulang,
Rangkang Kirai ngembuan utai nadai ketimpang.
Ubat serangkap genap bai ngabang,
Pengaroh bai maioh nadai kekurang.
Kelatang baju subak bai nuan ngabang,
Ngambi ka engkerabun antu buntak,
Awak ka rari besak ngagai silak menoa puang.

Kelatang baju ubong,
Bai nuan nandai nurun ngabang,
Ambi ka engkerabun antu lunchong,
Ngambi ka rari ngagai arong nanga Palimbang.
Nya alai kelatang baju kebat nuan bai nurun ngabang,
Engkah ka nuan di tanah belakang lengkap,
Ngambi ka nyerangkap nudong dandang.

Tabir kedil bai nuan ngabang,
Bantil ka digelagir tisau umai.
Abau badau bai nuan ngabang,
Tan ka di pulau tisau serarai.
Jala pisit bai nuan ngabang,
Kena nyala antu pipit enggau antu chit,
Ngambi ka parai jempit,
Kena kepit bubong peninggang.

Enti nuan jambai deh orang tuai,
Mai beram padi temenyok,
Nganjong ka orang laba pelandok,
Tang nuan anang ngasoh iya nyubok ari belakang.

Enti nuan jambai mai beram padi wi,
Nganjong ka orang laba babi,
Ke mengeli menyadi ngelong bekumbang.

Enti nuan jambai mai beram padi paya,
Nganjong ka orang laba rusa,
Ke betandok ngena lima bepampang.

Tak bejalai lalu orang ari nya,
Deras ari peluru leka bangkang.
Jala deras baka upas juing pematang.
Tang nyuong orang di munggu pangka ngitar,
Kena pijar bedil temaga,
Ke bechagak rangang-rangang.

Nyuong orang di lenggam palan betajar langgar pedang,
Mata changka tajam gerenyam.
Nait ka bukit lubang sawa di tuchong sandong gemala,
Ke segenda tampak terang.

Nyuong sida di seberai batu jerua kena pansa beras kuning,
Pandang perenching jalai raya,
Kena bandong engkeramba gaga Keling,
Ke tau bepencha pandai beladang,
Ke sipa kaki kuta.

Nya menoa dipangkang Iyak Tambak Bunga Jerami,
Ke beati sinu kasih,
Endu Tangkong Puchong Penguji,
Mereti ati tau ajih.

Lapa pintu kiai indai,
Tekebu lalu tesilak,
Lapa dinding teseging lalu tekayak?

Nya nadai ditanya ka nuan endu,
Nya ga manok labang ngambi ngabang,
Manok tawai ngambi makai,
Manok pagah datai madah,
Ka sulu jako kirum pesan,
Asoh anak mensia ngambi mansang.

O!!!…enti munyi nya sapa orang
Enggau aku ngabang,
Enggau aku mansang,
Eggau aku makai,
Enggau aku nandai?

Aki nuan Jelukong Tuai,
Nya bai ngabang,
Berumah di penyurai tisau langit.
Raja Rirong berumah di menyaung tuchong bukit.

Kati nuan aki enggau aku ngabang,
Enggau mansang,
Enggau Makai,
Enggau nandai?

Aku enda uchu!,
Nyerumba lemai sabong petang,
Aku bejalai niti penyurai rumah panjang,
Gawa ngerandang jalai bintang,
Enggai ka salambang salah sukat.
Nyerumba lemai petang malam,
Aku nangkin perapang pedang besuran,
Aku gawa ngerandang jalai bulan,
Enggai ka salepan salah tiap.

O!!!…kati nuan apai enggau aku ngabang,
Enggau aku mansang,
Eggau aku makai,
Enggau aku nandai?

Aku pan enda ga endu,
Tuboh tempulor lambor radu,
Aku gawa ngemata ka kayu,
Bisi besai bisi ga punggu,
Tang semua nyatu dikerindu,
Dipeguna bansa China.
Sapagi basah tu aku endu nadai hari,
Laban aku gawa ngemata ka tanah,
Bisi tinggi bisi ga rendah,
Tang tanah ke betingkah jadi kerapa.
Nyerumba telian ujan mesi,
Aki endu ngemata ka ai,
Tang ai ke nyelai,
Bepati enda sabaka nanga.

O!!!…kati nuan indai enggau aku ngabang,
Enggau aku mansang,
Eggau aku makai,
Enggau aku nandai?

Aku pan enda meh endu,
Tumboh tempulor lambor gadong,
Aku gawa ngempok tanah nempusong,
Ngambi ka nyadi idong,
Ke renjong antara mata.
Tumboh telian ujan merabujah,
Aku ngempok tanah basah,
Bejadi dilah antara nyawa.
Tumboh telian ujan mesi tu kemari,
Aku ngempok tanah bari,
Ngambi ka iya jadi isi,
Ke bali nadai ngapa.

O!!!…enti munyi nya,
Bula ninting nuan indai,
Munyi niang Ging,
Ke ngumbai diri nemu pating aur gangging,
Ke teling-teling bulih senumpu lubang.

Bula nempan nuan indai,
Munyi niang Lam,
Ke nusoi diri nemu ikan ngaban,
diau di dan bungkong tapang.

Bula nyentok nuan indai,
Munyi niang ubok menya,
Ke ngumbai diri tau natok sandok pesok,
Enggau tunjok jari ngengkang.

O!!!…nama nuan endu,
Tak bebula aku enda bebasa,
Tak bebangar aku diau di menoa.
Uji tungkun ka nuan endu belum,
Tak sataun enda empa api.
Enti aku bula endu,
Uji tanam nuan jeluan,
Sabulan enda tumboh padi.

Niang Rekaya Dana menya,
Aku ga orang ngemata ka iya,
Nya mun iya tediri jadi Raja,
Rengong-rengong nangong pebenong tajau menaga.
Tang sakali aku ngandau laun dani,
Dia aku ninga berita iya enda panjai nyawa,
Baru pala salampor buban.

Niang Linggir laki Anong menya,
Aku ga orang ngemata ka iya,
Nya pun iya bulih simpuli padi nibong,
Matak chagak bedil kelutong,
Nanggong pegeri menaga burong,
Nya mun tandang iya tau serang,
Ari baroh petakang bintang begupong.
Tang deh enda mukai-mukai,
Sakali menya leboh aku ngandau laun dani,
Tindok di retok papan simpong,
Nya alai bekau nya bisi aku ninga iya ke salah burong,
Nya mun ka iya enda panjai nyawa,
Baru pala beselat uban.

Niang Minggat apai Runai menya,
Aku ga orang ngemata ka iya.
Nya mun ka iya tediri jadi besai,
Nanggong pebenong ringka rawai,
Matak chagak bedil ensengai.
Tang sakali aku ngandau laun dani,
Tindok di retok papan lekai,
Bekau nya aku ninga rita iya,
Parai di Panai saberai tiban Nanga San.

Sapa deh orang enggau aku ngabang,
Enggau aku mansang,
Eggau aku makai,
Enggau aku nandai?

Ibu nuan Salaka Mas Banda,
Bai nuan ngabang,
Ngambi ka iya mai pantak panau bunga,
Ngambi ka tak beria mandang tegalan.
Ibu nuan Kelinah,
Nya bai nuan ngabang,
Ke bejalai ngambu tengah,
Ke belubah nganti pangan.
Seraya kita nemuai ngagai aya nuan Kedoh,
Ke tau nyilup tudoh tengah menoa
Tau nyigau bunsu kemarau bulan lapan.
Seraya kita nemuai ngagai aya nuan Peka,
Penempa buah raya bunga,
Ngemata ka anak mensia selampor buban.

OooooHoi!!! X 3

Tak lalu bejalai laju sida ari nya,
Baka peluru leka bangkang,
Bejalai deras baka upas juing pematang.
Enda sempat alai manggai id batang bengang betusu,
Ke pesok teling-teling.
Nya ga palan indai pipit antu,
Ngansah pugu entemu lalang,
Datai di ai enda mandi nyepoh layang,
Datai di lubok tak enda jempok nipok belakang.

Lalu bejako Endu Dara Kupak Kawa,
Ka sera nyawa ngeleda luput,
Endu Dara Kelinah Tampok Buah,
Keterubah mula idup.
Lalu nuan Tuanku,
Datai ari batu tikal surat,
Raja indu ke bejako tulong engkeramat.

Nama kabuah aku enda lalu!
Nama kabuah kita ngumbai,
Kita nyanggai?
Nama kabuah kita madah,
Kita nunggah?

Kami, alai ngangau ka kita,
Mai kita ngelabong beliong,
Meda iya nyau enda tajam.
Mai kita nyimpan ka balan meri baja,
Ngambi ka iya gerenyam makai kukut.
Kami mai kita mensiang tapang
Meda iya nadai agi rembia,
Ngambi ka iya berebut tepan singut.

Kami tu mai kita ngidup ka ipoh,
Meda iya nyau enda munoh,
Ngambi pulai baal,
Bisa di nyawa,
Pait di mulut.

Kami tu mai kita nanggong
Tuboh lempong ka batu anggong,
Ngambi ka beruntong nguan menoa.
Mai kita nanggong tuboh besai,
Ka batu chanai ngambi ka tebantai jadi raja.

Aku minta nuan nyagu ka tuboh aku
Ngagai batu pampang saribu,
Ngambika gayu asoh antu,
Nadai apa-apa asoh Petara.
Anang bupang kangau lemambang,
Anang belebu jako aku,
Anang bekabau kangau Bujang Lemambang Empeliau,
Angkat mengkanjong anak Bujang Lemambang Kuang Kapong,
Nampok dituchong Rabong Benama.

Udah tembu lemambang nyampi, dia sida lalu berengkah mengap.